• 4.1. Introdución
• 4.2. Como debe ser un lugar de traballo seguro?
• 4.3. Como debe ser un equipo de traballo seguro?
• 4.4. Protección colectiva e individual
• 4.5. Sinalización de seguridade
• 4.6. A cor na industria
• 4.7. Riscos xerais e a súa prevención

4.3. Como debe ser un equipo de traballo seguro?

Con respecto aos equipos de traballo, débese ter en conta:

1. Que sexan seguros (marcado CE), que estean instalados seguindo as instrucións
   do fabricante, adaptados aos traballadores, e axeitados á actividade a desenvolver.
2. Que os traballadores recibiran a información e formación adecuada sobre como utilizar o equipo e realizar o mantemento, que riscos conleva o seu manexo e as medidas preventivas a adoptar.
3. Que os traballadores realicen un uso e mantemento seguro do equipo.

O RD 1215/1997 establece, no marco da Lei 31/1995 do 8 de novembro, de prevención de riscos laborais, as disposicións mínimas de seguridade e saúde para a utilización polos traballadores dos equipos de traballo.

A partir de 1 de xaneiro de 1.995, todas as máquinas comercializadas e/ou postas
en servizo, deberán dispoñer de marcado CE, declaración CE de conformidade e
manual de instrucións.

Nas empresas do sector téxtil evidénciase a existencia dun importante parque de máquinas anteriores a 1.995 que, con carácter xeral non disporán de marcado CE, declaración de conformidade CE e manual de instrucións, polo que se deberán adecuar ao establecido no Real Decreto 1215/1997. Para estes equipos de traballo que non teñen marcado CE hai que comprobar que cumpren todos e cada un dos requisitos do citado Real Decreto. Calquera anomalía detectada supón unha desconformidade coa norma e precisa da implantación de medidas correctoras.

Dito isto, o empresario debe:

• Adquirir máquinas seguras (maquinas co marcado CE).
• Instalar, utilizar e manter axeitadamente a máquina, seguindo as instrucións do
  fabricante.
• Revisar as máquinas das que xa se dispón.

Os principais perigos derivados da utilización de máquinas son:

a) Perigo mecánico: son os causados polos elementos móbiles (coitelas, carros, etc.) da máquina, polos de transmisión (eixes, poleas, etc.), por proxección de elementos da máquina como consecuencia da súa rotura e por proxección do material traballado.

b) Perigo eléctrico: choque eléctrico ou queimaduras por contacto con partes en tensión (contactos directos), accidentalmente en tensión (contactos indirectos), ou illamento inadecuado.

c) Perigo térmico: queimaduras por contacto con obxectos ou materiais quentes.

d) Perigos producidos pola exposición ao ruído: o ruído xerado polas máquinas pode causar perda da agudeza auditiva, fatiga, interferencia coa comunicación oral e con sinais acústicos.

e) Perigos producidos pola exposición a vibracións: as vibracións moi intensas poden dar lugar a trastornos musculares na man, lumbago, ciática...

f) Perigos por mal deseño da máquina: a inadecuación da máquina ás características e aptitudes humanas, pode ser orixe de efectos fisiolóxicos derivados de posturas incómodas, esforzos excesivos ou repetitivos.

As medidas destinadas a reforzar a seguridade ao traballar con máquinas adoitan ser medidas integradas no deseño e construción das mesmas (evitar arestas cortantes, limitación por deseño de ruído e vibracións, características dos materiais, etc.), as cales buscan que esta non constitúa un risco.

Pero nalgunhas ocasións, este risco non se pode eliminar na orixe e polo tanto hai que utilizar medios de protección colectiva: resgardos e dispositivos de seguridade.

a) RESGARDO: elementos dunha máquina utilizados especificamente como barreira material para evitar que o traballador entre en contacto con calquera punto da máquina que lle poida provocar o accidente (carcasa, pantalla, porta, cuberta, etc.).
Algúns deles:

b) DISPOSITIVO: son aqueles, distintos do resgardo, que eliminan ou reducen o risco,
só ou asociado a un mando.
Algúns deles:

Á parte das medidas citadas, existen outras que se poderían resumir en:

• Técnicas de formación e información: indicacións para o transporte, instalación, precaucións a ter en conta no uso, instalación e mantemento, etc.
• Precaucións suplementarias:
  -Precaucións para situacións de emerxencia: dispositivos de parada de emerxencia, de rescate de persoas.
  - Indicacións de como eliminar a fonte de enerxía ou bloquear partes perigosas, etc.

Para realizar traballos de reparación, mantemento ou limpeza dunha máquina, debe consultarse antes o libro de instrucións, e logo repoñer os resgardos e dispositivos en caso de que fosen retirados.