7. Axencia Europea de Substancias e Preparados Químicos (ECHA)

A Axencia, con sede en Helsinqui (Finlandia), xestionará os procesos de rexistro, avaliación, autorización e restrición de substancias e preparados químicos co fin de garantir a súa coherencia no territorio da Unión Europea. Estes procesos REACH teñen por finalidade obter información adicional sobre as substancias e os preparados químicos para permitir o seu emprego seguro e garantir a competitividade da industria europea.

As decisións da axencia tomaranse tendo en conta os mellores datos científicos e técnicos e a mellor información socioeconómica dispoñible. A axencia tamén proporcionará información sobre substancias e preparados químicos, así como asesoramento técnico e científico. Na avaliación e aprobación das propostas de ensaio, a Axencia velará por que os ensaios con animais queden reducidos ao mínimo.

Durante os seus 12 primeiros meses de funcionamento, a axencia dedicarase a establecer a súa organización e a contratar persoal para estar en condicións de aceptar rexistros a partir do 1 de xuño de 2008.
O sitio da axencia é o punto de entrada único cara a toda a información sobre REACH. Permite acceder a orientación técnica, preguntas frecuentes, ferramentas informáticas e servizos de asistencia. Ofrécense tamén as últimas actualizacións en materia de orientación, ferramentas, datos sobre substancias químicas e o Regulamento.

A Axencia Europea de Substancias e Preparados Químicos ten por misión:

• - Xestionar e executar os aspectos técnicos, científicos e administrativos do REACH.
  
• - Velar pola coherencia destos aspectos a escala comunitaria.
  
• - Facilitarlles aos Estados membros e ás institucións comunitarias o mellor asesoramento científico e técnico posible en cuestións relacionadas coas substancias químicas cubertas baixo REACH.
  
• - Xestionar bases de datos, documentos e instrumentos de orientación baseados nas tecnoloxías informáticas .
  
• - Apoiar os servizos de asistencia nacionais e ofrecer un servizo de asistencia aos solicitantes de rexistro.
  
• - Pór á disposición do público información sobre substancias químicas.