VÍAS DE ENTRADA DOS CONTAMINANTES NO ORGANISMO

Os axentes químicos poden penetrar no organismo por varios camiños que denominamos vías de entrada e que son:

• Vía respiratoria.
  É a vía de penetración de substancias tóxicas máis importante no ambiente de traballo, xa que no aire que respiramos encóntranse todo tipo de substancias: sólidos en forma de po, líquidos en forma de vapor e gases que se mesturan directamente co aire.
  
  
• Vía dérmica.
  Existen substancias capaces de atravesaren a pel, sen provocar alteracións nela, e de pasar ao sangue que será o que as distribúe por todo o organismo. Os factores que van intervir son: superficie total da pel exposta, estado da pel e as características da propia substancia (máis ou menos liposoluble).
  
  
• Vía dixestiva.
  É unha vía de penetración pouco habitual xa que as substancias coas que traballamos non as metemos na boca, de todos os xeitos, hai posibilidade de penetración por vía dixestiva cando se come no posto de traballo, se fuma, se bebe e non se lavan as mans antes de comer, aínda que sexa fóra do posto de traballo. Cunhas adecuadas prácticas hixiénicas persoais, abonda para evitar esta penetración.
  
  
• Vía parenteral.
  Chámase parenteral a entrada de substancias a través dunha ferida preexistente ou provocada por un accidente como unha picada ou un corte.