10. Métodos de actuación: sobre o foco contaminante

As diferentes formas de actuación, por orde de prioridade, no foco de contaminación son:

- O deseño do proceso, tendo en conta os riscos hixiénicos que poden xerarse co fin de introducir as modificacións oportunas, como o peche do proceso e a automatización na fase de proxecto.

- A substitución dun produto tóxico por outro menos tóxico, como as pinturas con pigmentos de chumbo e cromo, por outras con metais menos tóxicos; os disolventes orgánicos por solucións acuosas ou aceites especiais, ou ben efectuar un cambio nas condicións físicas da materia prima. No caso dos disolventes hai que ter en conta o seu índice de perigosidade ou relación entre a capacidade de pasar ao estado de vapor e a toxicidade (o valor límite) do composto.

- A modificación do proceso produtivo por outro menos contaminante, como a substitución da pintura a pistola pola pintura con esparexido electrostático, brocha ou inmersión.

- O illamento de determinados procesos contaminantes do resto das áreas de traballo, como o chorreado con area ou ben realizar determinadas operacións fóra das horas normais de traballo, como o lavado de tanques ou a limpeza e mantemento das instalacións.

- A utilización de métodos húmidos, por atomización de auga ou de calquera outro líquido sobre a fonte de contaminación, pode ser moi efectiva en operacións de mecanizado en máquinas, no tratamento de rochas minerais e no paso de vehículos en explotacións a ceo aberto.

- Ventilación localizada.

Os métodos anteriormente expostos deben complementarse cun mantemento periódico dos equipos e instalacións.