17-03-2010- A firma española de moda infantil Pili Carrera continúa o seu proxecto de expansión polo mercado internacional coa apertura dun novo establecemento en Moscova, reforzando desta maneira a súa presenza no exterior onde xa conta con tendas en México, EE.UU., Portugal e agora Rusia. Na capital rusa a compañía vén de inaugurar unha tenda no exclusivo centro comercial Lotte Praza, un dos principais centros comerciais da cidade onde se sitúan importantes firmas de moda internacional.

Esta tenda supón un primeiro paso no proxecto de implantación da firma en Rusia onde está prevista a apertura doutros dous establecementos. Outro dos obxectivos a curto prazo é a apertura da segunda tenda en Madrid, concretamente na rúa Claudio Coello, así como novos centros nos países árabes e Angola.

Nos últimos anos, Pili Carrera incrementou a súa presenza no exterior onde xa conta con tendas en EE.UU., México e Portugal. Ademais, a firma continúa coa distribución iniciada hai tres anos nos exclusivos almacéns Harrods de Londres e está presente en 800 puntos de venda multimarca en todo o mundo.

Desde que iniciou a súa actividade en 1963, Pili Carrera foi consolidando a súa presenza no mundo do neno incorporando novas liñas de produción e ampliando mercados. Un alicerce básico na súa estratexia de crecemento é a de ofrecer ao cliente todo o necesario para vestir ao neno e a súa habitación coas coleccións de moda, puericultura, mobiliario e a súa recente liña de artigos de agasallo e decoración.